ਮਸ਼ਹੂਰ ਗਾਇਕਾ ਦਾ ਅਚਾਨਕ ਦਿਹਾਂਤ, ਸੰਗੀਤ ਜਗਤ ‘ਚ ਸੋਗ ਦੀ ਲਹਿਰ
ਮੁੰਬਈ – ਸੰਗੀਤ ਜਗਤ ਤੋਂ ਇੱਕ ਹੋਰ ਦੁਖਦਾਈ ਖ਼ਬਰ ਸਾਹਮਣੇ ਆਈ, ਜਿਸ ਨੇ ਇੰਡਸਟਰੀ ਵਿੱਚ ਸੋਗ ਦੀ ਲਹਿਰ ਦੌੜਾ ਦਿੱਤੀ ਹੈ। ਕਰਨਾਟਕ ਦੀ ਮਸ਼ਹੂਰ ਕੰਨੜ ਲੋਕ ਗਾਇਕਾ ਅਤੇ ਪਦਮਸ਼੍ਰੀ ਪੁਰਸਕਾਰ ਜੇਤੂ ਸੁਕਰੀ ਬੋਮਾਗੌੜਾ (Sukri Bommagowda) 88 ਸਾਲ ਦੀ ਉਮਰ ਵਿੱਚ ਅਲਵਿਦਾ ਕਹਿ ਗਈ। ਉਹ ਪਿਛਲੇ ਕੁਝ ਦਿਨਾਂ ਤੋਂ ਬਿਮਾਰ ਸਨ ਅਤੇ ਵੀਰਵਾਰ ਸਵੇਰੇ ਆਪਣੇ ਘਰ ਵਿੱਚ ਆਖਰੀ ਸਾਹ ਲਿਆ।
ਲੋਕ ਗੀਤਾਂ ਦੀ ਦੁਨੀਆ ਵਿੱਚ ਵੱਡਾ ਯੋਗਦਾਨ
ਸੁਕਰੀ ਬੋਮਾਗੌੜਾ ਕਰਨਾਟਕ ਦੇ ਅੰਕੋਲਾ ਖੇਤਰ ਦੇ ਹਲੱਕੀ ਵੋਕਾਲਿਗਾ ਕਬੀਲੇ ਨਾਲ ਸਬੰਧਤ ਸਨ। ਉਨ੍ਹਾਂ ਨੇ 5000 ਤੋਂ ਵੱਧ ਲੋਕ ਗੀਤ ਗਾਏ, ਜਿਸ ਕਾਰਨ ਉਨ੍ਹਾਂ ਨੂੰ ‘ਚਲਦਾ ਵਿਸ਼ਵਕੋਸ਼’ ਵੀ ਕਿਹਾ ਜਾਂਦਾ ਸੀ। ਸੰਗੀਤ ਤੋਂ ਇਲਾਵਾ, ਉਹ ਕਈ ਸਮਾਜਿਕ ਅੰਦੋਲਨਾਂ ਵਿੱਚ ਵੀ ਸ਼ਾਮਲ ਰਹੇ। ਬਿਮਾਰੀ ਦੇ ਕਾਰਨ ਉਨ੍ਹਾਂ ਨੂੰ ਕੁਝ ਦਿਨ ਪਹਿਲਾਂ ਮੰਗਲੁਰੂ ਦੇ ਇੱਕ ਨਿੱਜੀ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਸੀ, ਪਰ ਡਾਕਟਰ ਉਨ੍ਹਾਂ ਦੀ ਜ਼ਿੰਦਗੀ ਨਹੀਂ ਬਚਾ ਸਕੇ।
ਪਦਮ ਸ਼੍ਰੀ ਤੇ ਹੋਰ ਪੁਰਸਕਾਰਾਂ ਨਾਲ ਸਨਮਾਨਿਤ
ਸੁਕਰੀ ਬੋਮਾਗੌੜਾ ਨੂੰ ਕਬਾਇਲੀ ਸੰਗੀਤ ਦੀ ਸੰਭਾਲ ਅਤੇ ਉਤਸਾਹ ਵਧਾਉਣ ਲਈ ਕਈ ਪੁਰਸਕਾਰ ਮਿਲੇ।
2006 ਵਿੱਚ ਹੰਪੀ ਯੂਨੀਵਰਸਿਟੀ ਨੇ ਉਨ੍ਹਾਂ ਨੂੰ ਨਾਦੋਜਾ ਪੁਰਸਕਾਰ ਦਿੱਤਾ।
ਉਹ ਪਦਮ ਸ਼੍ਰੀ ਅਤੇ ਜਨਪਦ ਸ਼੍ਰੀ ਪੁਰਸਕਾਰ ਵੀ ਜਿੱਤ ਚੁੱਕੀਆਂ ਸਨ।
ਸਮਾਜਿਕ ਕਾਰਜਾਂ ਵਿੱਚ ਵੀ ਰਹੇ ਸਰਗਰਮ
ਸੁਕਰੀ ਬੋਮਾਗੌੜਾ ਨੇ ਆਪਣੇ ਭਾਈਚਾਰੇ ਵਿੱਚ ਜਾਗਰੂਕਤਾ ਫੈਲਾਉਣ ਲਈ ਲੋਕ ਗੀਤਾਂ ਦੀ ਵਰਤੋਂ ਕੀਤੀ। ਉਹ ਸ਼ਰਾਬ ਦੀ ਵਿਕਰੀ ਵਿਰੁੱਧ ਚਲਾਏ ਗਏ ਇੱਕ ਵੱਡੇ ਅੰਦੋਲਨ ਦੀ ਅਗਵਾਈ ਵੀ ਕਰ ਚੁੱਕੀਆਂ ਸਨ।
ਨੇਤਾਵਾਂ ਵੱਲੋਂ ਸ਼ਰਧਾਂਜਲੀ
ਕਰਨਾਟਕ ਦੇ ਮੁੱਖ ਮੰਤਰੀ ਸਿੱਧਰਮਈਆ, ਉਪ ਮੁੱਖ ਮੰਤਰੀ ਡੀ.ਕੇ. ਸ਼ਿਵਕੁਮਾਰ ਅਤੇ ਕੇਂਦਰੀ ਮੰਤਰੀ ਐੱਚ.ਡੀ. ਕੁਮਾਰਸਵਾਮੀ ਨੇ ਉਨ੍ਹਾਂ ਦੇ ਦਿਹਾਂਤ ‘ਤੇ ਦੁੱਖ ਪ੍ਰਗਟ ਕੀਤਾ। ਸੋਸ਼ਲ ਮੀਡੀਆ ‘ਤੇ ਵੀ ਲੋਕ ਉਨ੍ਹਾਂ ਨੂੰ ਭਾਵਭਿੰਨੀ ਸ਼ਰਧਾਂਜਲੀ ਪੇਸ਼ ਕਰ ਰਹੇ ਹਨ।
